உன்னைப் போல் ஒருவன்

உன்னைப் போல் ஒருவன்

உ.போ.ஒ வை அண்மையில் பார்த்தேன்.இந்தி மூலத்தினை இன்னும் பார்க்கவில்லை. உ.போ.ஒ எனக்கு சிறப்பான படமாகத் தோன்றவில்லை. இதை விட சராசரி மசலாப் படங்களே பரவாயில்லை. உ.போ.ஒ வை வெறும் கருத்தியல் ரீதியாக அணுகி விமர்சிக்கலாம். அதை விட, என் பார்வையில், படத்தில் உள்ள பிரச்சினை அதன் நம்பகத்தன்மையும், பிரச்சினைகள் அணுகப்படும் விதமும். மசலாப் படங்கள் ஒருவித அபத்தம் என்றால் இது இன்னொரு வித அபத்தம். தொழில் நுட்பம் இந்த அபத்தத்தினை சரி செய்து விடாது. இந்தியில் இப்படி இல்லை, தமிழில் இப்படி, தமிழை விட இந்தி வடிவம் பரவாயில்லை, நசுரூதின் ஷா கமலை விட சிறப்பாக அந்தப் பாத்திரத்தினை உள்வாங்கி நடித்திருந்தார் போன்ற விமர்சனங்களையும் படித்தேன்.

என்னுடைய கருத்து என்னவென்றால் படம் ஒரு முழு அதீத கற்பனையான படமாகவும் இல்லை, முழு யதார்த்தப் படமாகவும் இல்லை. கிட்டதட்ட சாத்தியமற்ற ஒன்றை சாத்தியமானது போல் காட்டுகின்ற படம் இது.ஒரு நபர் ஒரே நேரத்தில் பத்து பேரை சமாளித்து சண்டை போடுவது மசாலாப் படங்களில் வரும் அபத்தம் என்றால் இந்தப் படத்தின் அடிப்படை கருவே/கதையே அதை விட அபத்தமாக இருக்கிறது. சில மன அரிப்புகளை தீர்க்க சிலருக்கு இந்தப் படம் உதவலாம்.

படத்தினை வெறும் கருத்தியல் பிரதியாக சுருக்கிப் பார்க்க விரும்பவில்லை. இருப்பினும் படத்தின் மையக் கரு கருத்தியல் சார்ந்த ஒன்றாக இருக்கிறது. அதை தீவிர வாத வெறுப்பு கருத்தியல் என்று புரிந்து கொள்ள முடியும் என்பதையுணர்ந்து 'மாற்றுக்' குரல்களும் படத்தின் இடம் பெறுகின்ற வகையில் படம் எடுக்கப்பட்டுள்ளது. சிக்கல் என்னவென்றால் அது அப்பட்டமாகத் தெரிவதால் எதை மறைக்க நினைத்தார்களோ அது இன்னும் வெளிப்படையாகத் தெரிகிறது. வரலாற்று அறிவு இன்றி, இந்தியாவில் அரசு அதிகார அமைப்பு எப்படி செயல்படுகிறது என்பது குறித்த அடிப்படை புரிதல் இன்றி எடுக்கப்பட்ட படம் இது. எந்த சாதாரண மனிதனால் இதை யெல்லாம் செய்வது சாத்தியம். அதுவும் அவ்வளவு திறமையாக. சாதாரண மனிதனும், முட்டாள் காவல்துறையும் என்று படத்திற்கு இன்னொரு பெயர் வைத்திருக்கலாம். படத்தில் சில பாத்திரங்கள் எதற்காக இடம் பெறுகின்றன, சில காட்சிகள் எதற்காக இடம் பெறுகின்றன என்றே தெரியவில்லை. நடாஷா ராஜ்குமார் என்ற பாத்திரம், கரிகாலன் என்ற பாத்திரம் இவை ஒட்டு மொத்த கதையில் என்ன பங்காற்றுகின்றன.

இப்படி படத்தில் பல குறைகள், அடிப்படை குறை கதை. திரைக்கதையின் நம்பகத் தன்மை துவக்கத்திலிருந்தே கேள்விக்குறியாதாகின்றது. படம் முடியும் போது எத்தகைய அபத்தம் இந்தப் படம் இது என்ற எண்ணமே மேலோங்குகிறது. தீவிரவாதம் குறித்த முட்டாள்த்தனமான
புரிதலை அடிப்படையாகக் கொண்டு கதையமைத்தால் இப்படித்தான் இருக்கும்.

சுருதி ஹாசனின் இசை பல இடங்களில் மெகா தொடர்களின் பிண்ணனி இசையை நினைவுபடுத்துகிறது. வசனகர்த்தார் தன் முழுத்திறமையைக் காட்டினாலும் படத்தில் உள்ள அடிப்படைக் கோளாறுகளை வசனத்தினால் சரி செய்துவிட முடியாது. எனவே முருகனை குறை கூற ஒன்றுமில்லை.

மொத்ததில் உ.போ.ஒ இன்னொருவிதமான ('மசாலத்தன்மையற்ற') அபத்தத் திரைப்படம்.

பி.கு: இது சுருக்கமான விமர்சனம். விரிவாக விமர்சித்து, குறைகளை அலசி எழுதலாம். அதில் உள்ள பிரச்சினை என்னவெனில் அடிப்படையிலிருந்து ஆரம்பித்து இதுதான் குறை, ஏனெனில் என்று விலாவாரியாக எழுத வேண்டும். இந்தியாவின் சமகால வரலாற்றை அறிந்த
யாருக்கும் இப்படத்தின் கதை, கதையோட்டத்தின் பலவீனம் எளிதில் புலப்படும்.

Labels: , , , ,

7 மறுமொழிகள்:

Blogger ILA மொழிந்தது...

என்ன படம்னு சொன்னீங்க?

11:19 AM  
Anonymous Anonymous மொழிந்தது...

Sorry to say this, Your review is one abatham.

BTW you didn't even know the name of the movie properly. Better luck next time.

Movie title is Unnai Pol Oruvan not Ennai Pol Oruvan.

11:41 AM  
Blogger கோவி.கண்ணன் மொழிந்தது...

குறிசொற்களுக்கு ஒரு 'ஓ'

11:45 AM  
Blogger ravi srinivas மொழிந்தது...

பெயரில் இருந்த பிழை சரி செய்யப்பட்டுவிட்டது.சுட்டிக்காட்டியமைக்கு நன்றி.

1:16 PM  
Anonymous Anonymous மொழிந்தது...

dear friend, ofcourse it is better than kandasamy abatham

1:39 PM  
Blogger Prabhu Rajadurai மொழிந்தது...

Why Jeyamohan in the Label? I have read Ira.Murugan wrote the script for this film.

7:30 AM  
Blogger ravi srinivas மொழிந்தது...

Prabhu Rajadurai, that was an error in cut and paste. It has been rectified now.Thanks for pointing out.

11:04 AM  

Post a Comment

<< முகப்பு