ஒபாமா, ஈழத் தமிழர், இடதுசாரிகள்

ஒபாமா, ஈழத் தமிழர், இடதுசாரிகள்

ஒபாமா பேசியிருப்பது அமெரிக்காவின் அக்கறையை காட்டுகிறது. அமெரிக்கா உட்பட வேறு சில நாடுகள் சர்வதேச அரங்கில் ஈழத்தமிழர் படும் இன்னல் குறித்தும், மனிதாபின அடிப்படையில் செய்ய வேண்டியவை குறித்தும் தொடர்ந்து அக்கறையை தெரிவித்துள்ளன. சில நாடுகள் என்ன நிலைப்பாடு எடுத்தன என்பதும் நமக்குத் தெரியும். அமெரிக்காவை எப்போதும் எதிர்த்தும் வரும் இடதுசாரிகள் அமெரிக்க ஏகாதிபத்தியம்தான் உலகின் முதல் எதிரி
என்பார்கள். ஈழத்தமிழர் பிரச்சினையில் அமெரிக்காவை அவர் பாராட்டுவார்கள் என்றோ, வேறு சில நாடுகளை விமர்சிப்பார்கள் என்றோ எதிர்பார்க்க முடியாது. சூடானில் நடப்பதை குறித்து இந்திய இடதுசாரி கட்சிகள் பெரிதாக அலட்டிக் கொள்ளவில்லை, ஆனால் பாலஸ்தீனம் என்று வரும் போது கூக்குரல் எழுப்புவார்கள். இஸ்ரேலுடன் ராணுவ உறவு கூடாது என்பார்கள். உள்ளூர் அரசியலோ, உலக அரசியலோ இடதுசாரிகளின் நிலைப்பாடுகளை நாம் அவர்கள் காட்டும் ஏகாதிபத்தியம், ஹிந்த்துவா/மதவாதம் போன்ற பூச்சாண்டிகளைக் கண்டு பயப்படாமல் அணுக முயல வேண்டும். இன்றைய சூழலில் கண்மூடித்தனமான அமெரிக்க எதிர்ப்பு என்பதை முன்னிறுத்தும் இடதுசாரிகளின் உலக கண்ணோட்டத்தினை நாம் நிராகரிக்க வேண்டும்.ஈழத்தமிழர் பிரச்சினை என்று இல்லை, வேறு எதுவாயினும் அவர்கள் நிலைப்பாடுகளை கேள்விக்குட்படுத்த வேண்டும். இந்தியாவின் நலன் முக்கியமா,இடதுசாரிகளின் உலகப்பார்வை முக்கியமா என்றால் இந்தியாவின் நலன் தான் முக்கியம். அதுபோல் ஈழத்தமிழர் நலனை முன்னிலைப்படுத்தியே இடதுசாரிகளின் உலக கண்ணோட்டத்தை கேள்விக்குட்படுத்த வேண்டும். இடதுசாரிகளின் பல நிலைப்பாடுகள் மீது எனக்கு விமர்சனம் உண்டு. அதை எழுதியிருக்கிறேன். ஹிந்து ஆப்கனில் குண்டு வீசும் அமெரிக்கா இலங்கை அரசை குறை கூறுவதை எழுதி அமெரிக்காவை hypocrite என்று எழுதும்.நாமும் சொல்வோம் ஹிந்து அமெரிக்காவை விட பெரிய hypocrite என்று. அமெரிக்காவையும், இலங்கை அரசையும் ஹிந்து விமர்சித்தால் அதை ஏற்க முடியும். அவ்வாறில்லாமல் அமெரிக்காவை மட்டும் விமர்சிப்பது என்பதை நாம் எதற்காக ஏற்க வேண்டும். இடதுசாரிகளுக்கும் இது பொருந்தும்.

எனவே தேசிய அரசியலோ, உலக அரசியலோ இடதுசாரிகளின் அரசியல் தமிழர் நலனுக்கு எதிராக இருந்தால், தமிழர் நலனுக்கு எதிரான சக்திகளுக்கு இருந்தால் அதை அந்த நோக்கில் அணுக வேண்டும். ஏகாதிபத்திய எதிர்ப்பு, பாசிச எதிர்ப்பு, ஹிந்த்துவ எதிர்ப்பு என்ற மாய்மாலங்களை நிராகரிப்போம். தமிழர் என்ற சொல்லை இங்கு பரந்த பொருளில் பயன்படுத்துகிறேன். இந்தியாவில் வாழும் தமிழர்களை மட்டும் இது குறிப்பதாக
எடுத்துக் கொள்ள வேண்டாம். இடதுசாரி, முற்போக்கு,மதச்சார்பின்மை போன்ற சொல்லாடல்களை நம்பி ஏமாறமாட்டோம் என்று இடதுசாரிகளுக்கு உணர்த்த வேண்டும்.

Labels: , , ,

0 மறுமொழிகள்:

Post a Comment

<< முகப்பு